مقارنة Galaxy A52s 5G مع Xiaomi 11T و Honor 50 – افضل موبايلات الفئة المتوسطة !

Xiaomi 11T و Honor 50

الفترة اللي فاتت نزل أكثر من 3 موبايلات جديدة في الفئة المتوسطة العُليا في مصر .. واحنا النهارده هنعمل مقارنة بين أهم 3 موبايلات في الفئة دي حاليًا وهما Samsung Galaxy A52s 5G وموبايل Xiaomi 11T وموبايل Honor 50 .. وهنعرف مين فيهم أفضل من التاني في كل نقطة.


التصميم :-

موبايل Honor 50 هو أحلى وأشيك تصميم فيهم .. موبايل راقي جدًا Premium جدًا .. خامات من الزجاج مع وزن خفيف 175 جرام وتخانه قليلة 7.8 مللي .. وشكلة مُختلف عن الموبايل التانيه.

موبايل Galaxy A52s 5G خاماته بلاستيك بالكامل .. ولكن معاه ميزة تخلينا نتقبله في الفئة دي وهو مقاومة الماء بشهادة IP67 .. ميزة حصرية، وكمان وزن 189 جرام وتخانه 8.4 مللي.

اما موبايل Xiaomi 11T فا هو معمول للـGamers أكثر وبيبان فعلًا على تصميمه .. موبايل كبير، وزنه 203 جرام، تخانته 8.8 مللي .. ظهره زجاجي مع فريم من البلاستيك.


الشاشة :-

شاشة Xiaomi 11T من نوع AMOLED بحجم 6.67 بوصة .. شاشة Honor 50 من نوع OLED بقياس 6.57 بوصة .. شاشة Galaxy A52s 5G من نوع Super AMOLED بقياس 6.5 بوصة.

الـ3 شاشات ممتازين وداعمين لل120 هرتز .. وكل شاشة فيهم ليها نقطة تفوق، أولهم شاشة A52s 5G واللي هي أحلى شاشة من ناحية الألوان ودرجة تشبع الألوان المُمتازة.

تاني شاشة هي الـHonor 50 واللي هي أحلى شاشة علشان Curved وبتديلك فخامة ورُقي .. بس قصاد كده هتاخد ثُقب سيلفي كبير أوي في نص الشاشة.

الـXiaomi 11T هو على الورق المفروض أعلى سطوع فيهم، بس ده مش محسوس أوي في التجربة الفعلية، هو أكبرهم من ناحية القياس وأحسنهم من حيث طبقة الحماية الـGorilla Glass Victus.


الأداء :-

الـXiaomi 11T بمعالج ميدياتك Dimensity 1200 .. اما الـA52s 5G والـHonor 50 بمعالجات سناب دراجون 778G .. موبايل شاومي 11T بيتفوق عليهم في نوع ذاكرة التخزين الـUFS 3.1.

الـXiaomi 11T هو الأسرع في معظم المهام زي فتح البرامج .. وده راجع للمعالج الأقوى وذاكرة التخزين الأسرع، وأداء الموبايل سريع فعلًا، ولكن مش فارق كتير أوي عن الـHonor 50 والـA52s 5G .. لكن هو أكتر موبايل فيهم بيسخن .. بيسخن بسرعه جدًا، لكن مش درجة سخونيه كبيرة، وبيجي وراه Honor 50 ثم A52s 5G.

الـHonor 50 هو المُتميز وسطهم على جانب الإستقرار، موبايل عاقل وسلس .. انت دائمًا هتكون متوقع أداءه وأداء ثابت مش بيتغير، مش مره هتلاقيه سريع ومره هتلاقيه بطيء .. بيجي في المركز التاني Galaxy A52s 5G وبعدين في المركز الأخير بيجي Xiaomi 11T.

بالنسبة للأداء الرسومي فا أقوى معالج رسومي في الموبايل موجود في الـ11T .. هو الوحيد اللي بيشغل ببجي على 90 فريم .. اما الـA52s 5G والـHonor 50 زي بعض في الألعاب .. أخرهم Ultra HDR.


عوامل الأمان وعناصر اخرى :-

بصمة Xiaomi 11T موجودة على زرار الباور وهي أكثر بصمة عملية وأداءها كويس .. هونر 50 بصمته موجودة تحت الشاشة وأداءها كويس برده .. بصمة A52s 5G تحت الشاشة وهي أبطأ واحدة فيهم، اما الـFace Unlock فا هو كويس في هونر 50 وشاومي 11T وكالعادة بطيء في A52s 5G.

الـ3 موبايلات فيهم NFC وفيهم Always On Display وفيهم ميكروفون اضافي لعزل الضوضاء .. الـXiaomi 11T بيتميز بمستشعر الـIR Blaster .. الـGalaxy A52s 5G هو الوحيد اللي فيه مدخل 3.5 مللي وهو الوحيد اللي ينفع تركب كارت ميموري مكان شريحة الإتصال الثانية .. الباقي مش بيدعم تركيب كارت ميموري.

جالاكسي A52s 5G تقدر تزود الرام فيه 4 جيجا، شاومي 11T تقدر تزود الرام 3 جيجا .. اما Honor 50 فا هو مش بيدعم ميزة الـRam Expansion.

الصوت Stereo في شاومي 11T والـA52s 5G .. ودرجة ارتفاع الصوت أقوى في Xiaomi 11T .. الـBass أحسن في الـGalaxy A52s 5G .. اما الـHonor 50 فا الصوت Mono وأقل بشكل واضح.

مستشعر التقارب موجود حقيقي في Honor 50 وأداءه ممتاز .. في المركز الثاني A52s 5G أداءه كويس مش هيدايقك، اما شاومي 11T فا ممكن يدايقك شوية في المكالمات والـVoices على واتس اب.

بالنسبة لقوة الشبكات فا الـ3 موبايلات ممتازين ومش هتلاقي فيهم أي أزمة.


البطارية :-

بطارية Xiaomi 11T بحجم 5000 مللي امبير .. بطارية Galaxy A52s 5G بحجم 4500 مللي امبير .. بطارية Honor 50 بحجم 4300 مللي امبير .. أداء سامسونج وهونر زي بعض بالظبط .. وشاومي بيقدملك نصف ساعه شاشة مفتوحة أزيد عنهم.

شاومي 11T معاه شاحن 67 وات .. هونر 50 معاه شاحن 66 وات .. بيشحنوا البطارية بالكامل في 40 دقيقة تقريبًا .. اما Galaxy A52s 5G معاه شاحن 15 وات بيشحن البطارية في ساعة ونصف أو أكثر.


الكاميرات :-

الكاميرا الأساسية في Galaxy A52s 5G بدقة 64 ميجا بيكسل فيها مثبت بصري .. وفي هونر 50 وشاومي 11T بدقة 108 ميجا بيكسل ومفيهاش مثبت بصري .. والسيلفي في A52s 5G وهونر 50 بدقة 32 ميجا بيكسل اما في الـXiaomi 11T بيجي بدقة 16 ميجا بيكسل.

شوف فيديو المقارنة علشان تشوف مقارنة كاملة بين الـ3 كاميرات !

في فيديو المقارنة جربنا الـ3 كاميرات جنب بعض وعملنا مقارنة شامله بينهم في مختلف أوضاع التصوير، وترتيب أداء الموبايلات في الكاميرا الخلفية من وجهة نظرنا في المركز الأول Galaxy A52s 5G وفي المركز الثاني Xiaomi 11T وفي المركز الأخير Honor 50.

اما عن ترتيب أداء الكاميرات الأمامية بعد المقارنة بينهم فا بيجي في المركز الأول Galaxy A52s 5G ثم في المركز الثاني بعده بيكون Honor 50 وفي المركز الأخير بيجي شاومي 11T.

بالنسبة لتصوير الفيديوهات فالـ3 موبايلات بيصوروا بجودة 4K بتوصل لـ30 فريم في الثانية .. الـ3 موبايلات بيدعموا ميكروفون اضافي لعزل الضوضاء، والـA52s 5G الوحيد فيهم اللي بيدعم مثبت بصري.


أسعار الموبايلات :-

سعر Galaxy A52s 5G :-

  • نسخة 128 جيجا مع 8 جيجا رام بسعر 6500 جنية
  • نسخة 256 جيجا مع 8 جيجا رام بسعر 7000 جنية

سعر Xiaomi 11T :-

  • نسخة 128 جيجا مع 8 جيجا رام بسعر 7000 جنية
  • نسخة 256 جيجا مع 8 جيجا رام بسعر 7700 جنية

سعر Honor 50 :-

  • نسخة 128 جيجا مع 6 جيجا رام بسعر 8000 جنية
  • نسخة 256 جيجا مع 8 جيجا رام بسعر 9000 جنية

الرأي النهائي :-

نقاط تميز وضعف Galaxy A52s 5G :-

  • موبايل ممتاز في التصوير
  • شاشة ممتازة جدًا
  • مقاومة للماء
  • صوت Stereo مُتميز
  • دعم منفذ 3.5 مللي
  • دعم تركيب كارت ميموري
  • بصمة مش أسرع حاجه
  • شاحن بطيء جدًا

نقاط تميز وضعف Xiaomi 11T :-

  • أقوى أداء في الألعاب
  • صوت Stereo عالي جدًا
  • بطارية ضخمة مع شحن سريع جدًا
  • كاميرا خلفية كويسة
  • مستشعر التقارب أداءه مش لطيف
  • سيلفي مش الأفضل

نقاط تميز وضعف Honor 50 :-

  • موبايل تصميمه شيك
  • خامات ممتازة فاخرة
  • شاشة Curved شيك جدًا
  • شحن سريع جدًا
  • سوفت وير سلس ومستقر جدًا
  • مستشعر تقارب حقيقي وأداءه ممتاز
  • سعره غالي
  • أداء الكاميرات الخلفية مش الأفضل

اما عن Poco F3 فا بإختصار هو قريب جدًا من شاومي 11T في الفئة دي في أغلب النقط .. بس الـXiaomi 11T أحدث وكاميراته أفضل خاصًة الخلفية وشاحن أسرع وبطارية أكبر، فا لو تقدر تزود وتجيب شاومي 11T هيكون أفضل.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

كل الموبايلات

أحدث الهواتف

أحدث الاخبار