مراجعة Xiaomi 11T الجديد – برنس موبايلات شاومي !

Xiaomi 11T

الفئة المتوسطة حاليًا في السوق المصري فيها منافسه قوية جدًا، وفيها كم موبايلات كبير .. لكن دائمًا هتلاقي تضحيات في حاجه من أربع حاجات وهما الشاشة والكاميرا والأداء والخامات .. وبالتالي هتحتاج تطلع لـ الفئة المتوسطة العُليا، والنهارده هنقدملكم مراجعة Xiaomi 11T أحدث موبايلات شاومي في الفئة المتوسطة العُليا!


التصميم :-

تصميم شاومي 11T من ناحية الخامات فا هو راقي جدًا، خامات زُجاجيه محترمة مع فريم معدني لطيف جدًا، وكمان مع جودة تقفيل ممتازة، وده المُعتاد من شاومي في الفئات السعرية المتوسطة العُليا.

بروز الكاميرا الخلفية معقول مش كبير، ده لإن الموبايل أساسًا تخين وبيجي بسُمك حوالي 8.8 مللي .. وكمان ثقيل شوية لإن وزنه بيكون 203 جرام، وكمان الموبايل كبير في الإيد مش صغير

الموبايل مقاوم لرذاذ الماء بشهادة IP53 .. كان نفسي يكون مقاوم للماء بشهادة أعلى شوية علشان كانت هتبقى ميزة قوية جدًا، ولكن صعب تاخد كل حاجه في موبايل فئة متوسطة عُليا، يا خامات يا حماية ضد الماء!


الشاشة :-

شاشة Xiaomi 11T هي شاشة كبيرة 6.67 بوصة من نوع AMOLED بدقة FHD+ مع تردد بيوصل لـ120 هيرتز، وثُقب متوسط الحجم للكاميرا السيلفي، والشاشة داعمة لأكثر من مليار لون.

الشاشة كويسة ولكن الألوان مش مُشبعة بالدرجة الزيادة، هي مُعتدلة .. ومفيش هنا الخيارات اللي بتبقى موجودة في موبايلات شاومي اللي في الفئة دي بتاعت الذكاء الإصطناعي للشاشة.

الشاشة كويسة .. ألوانها معقولة .. سطوعها تحت الشمس كويس، مش حاسس بأي مشكلة فيها، قللت السطوع وشوفت زوايا الشاشة لاقيتها كويسة مفيش أي مشاكل ظاهرة فيها.

وطبعًا الشاشة متركب عليها سكرينه .. وكمان محمية بطبقة حماية Corning Gorilla Glass Victus.


الأداء :-

المعالج هو ميدياتك Dimensity 1200 بيشتغل بتكنولوجيا 6 نانو ميتر .. معالج كويس جدًا نشيط جدًا، أداءه أحسن بنسبة بسيطة من سناب دراجون 778 وأحسن بنسبة أكبر في الألعاب.

نقطة تميز المُعالج ده فعلًا في الألعاب، ببجي اشتغلت على اعدادات Ultra HDR والتجربة كانت ممتازة جدًا، لكن الموبايل بيسخن بسرعه شوية، مش بيحصله اختناق لكن بيسخن والسخونيه بتاعته واضحه.

السوفت وير مواجهتش معاه أي مشاكل في فترة إستخدامي للموبايل .. الموبايل سريعة والتردد الـ120 هيرتز العالي مع المعالج بيقدمولك تجربة محترمة جدًا.


عوامل الأمان وعناصر اخرى :-

البصمة هنا موجودة على زِر الباور .. كالعادة في تجميع في أيقونات الواجهة والـAnimation سخيف شوية .. الـFace Unlock برده نفس القصة بس في المُجمل الأداء متوازن.

طبعًا عندك Always On Display وعندك NFC وعندك مستشعر الـIR Blaster وفي ميكروفون اضافي لعزل الضوضاء .. لكن للأسف مفيش مدخل 3.5 مللي ومفيش مكان لتركيب كارت ميموري.

صوت الموبايل Stereo وعالي .. جربته مع Galaxy A52s 5G والـ11T هو اللي كسب .. والهزات اللي بتحصل في ظهر الموبايل بسيطه ومش هتحس بيها لو مركب الجراب.

مستشعر التقارب هنا سوفت وير .. اداءه كويس وبيقفل الشاشة في الوقت المطلوب من أقل حركة، لكن أحيانًا الشاشة بتفضل تطفيه بعد ما تشيله من على أذنك وساعات هتحتاج تحركة علشان الشاشة تفتح .. بصراحة مش راضي عن أداء المستشعر ده، كان الأفضل يكون هاردوير خاصًة انه مش مُكلف.

جربته في Records الواتس اب ومفيش مشكلة فيه .. بسمع الـRecord عادي من غير ما يفتح على الـSpeaker الكبير، ولكن لما ببعده من على أذني بيفضل الـRecord في السماعة بتاعت المكالمات، مع ان المفروض يفصل .. أداء المستشعر معقول في إنه يقفل الشاشة لكن في فتح الشاشة مش مظبوط.

الشبكات بقى .. الـWi Fi وشبكات الإتصال معقولة جدًا، عمومًا في تحسن ملحوظ جدًا في شبكات موبايلات شاومي الجديدة، فا كويس انهم بيحسنوا منها الفتره دي.


البطارية :-

بطارية الموبايل بتيجي بسعة 5000 مللي امبير .. لو مشغل الـ120 هيرتز يادوبك هتاخد 6 ساعات شاشة مفتوحة .. وممكن توصل لـ7 ساعات.

الشاحن اللي بيجي مع الموبايل بقوة 67 وات .. شاحن سريع بيشحن البطارية في 40 دقيقة.


الكاميرات :-

الموبايل جاي بكاميرا أساسية 108 ميجا بيكسل بفتحة عدسة F/1.8 مع كاميرا تانيه للتصوير الواسع بدقة 8 ميجا بيكسل بفتحة عدسة F/2.2، والأخيرة 2 ميجا بيكسل F/2.4 وهي ماكرو والسيلفي 16 ميجا بيكسل بفتحة عدسة F/2.5.

قارنت Xiaomi 11T مع Galaxy A52s 5G .. في تفاوت كبير في نتايج صور الكاميرا الخلفية .. في صور كسب فيها 11T وفي صور كسب فيها A52s ولكن الفرق مش كبير .. مفيش واحد نقدر نقول عليه مش حلو.

انا مكنتش مستني ان الـ11T يكسب الـA52s .. انا كنت مستني انه ينافسه ويسد معاه، وده فعلًا حصل .. حتى في الإضاءات الضعيفة الأداء مش وحش خالص، لكن لو كان في مثبت بصري كان هيكون أفضل.

بالنسبة للسيلفي فا سيلفي Xiaomi 11T للأسف معجبنيش، معظم الصور مش حلوه خالص، الصور فعلًا أقل كتير من Galaxy A52s 5G وبفرق واضح.

فالموبايل بيقدر يصور لحد جودة 4K مع 30 فريم في الثانية .. وبيدعم الـHDR في تصوير الفيديوهات، وأداء التصوير مع المثبت الإلكتروني كويس جدًا.

شوف تجربة التصوير بالموبايل صور وفيديوهات ومقارنته بالمنافسين في فيديو المراجعة


سعر Xiaomi 11T :-

  • نسخة 128 جيجا مع 8 جيجا رام بسعر 7000 جنية
  • نسخة 256 جيجا مع 8 جيجا رام بسعر 7700 جنية

بينفع تركب شريحتين إتصال من الجيل الخامس لكن مينفعش تركب كارت ميموري.


الرأي النهائي :-

مميزات Xiaomi 11T :-

  • أداء قوي جدًا
  • شاشة ممتازة
  • تصميم فاخر ممتاز
  • صوت Stereo عالي
  • شاحن سريع جدًا
  • أداء ممتاز من الكاميرا الخلفية

عيوب Xiaomi 11T :-

  • مستشعر التقارب مش الأفضل
  • كاميرا سيلفي أداءها متواضع جدًا
  • وزن الموبايل ثقيل شوية
  • مفيش مدخل 3.5 مللي
  • مفيش مكان لـ كارت ميموري

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

كل الموبايلات

أحدث الهواتف

أحدث الاخبار