مراجعة Infinix Hot 11S – أفضل موبايل اقتصادي !

Infinix Hot 11S

معظم شركات الموبايلات الفتره دي بتنزل موبايلات إقتصادية بمعالجات قديمة وأداءها متواضع .. وبالتالي انت بتاخد تجربة أداء سيئة .. لكن انفينكس الفترة دي بتحاول تهتم بالفئة الإقتصادية علشان متبقاش واحدة من الشركات اللي بتنزل موبايلات بمعالجات متواضعه .. النهارده هنقدملكم مراجعة Infinix Hot 11S الجديد !


محتوي المقالة 

التصميم :-

تصميم Infinix Hot 11S الجديد من البلاستيك بالكامل سواء الظهر او الفريم .. زي أي موبايل إقتصادي، لكن عليه نقشة خفيفه بتتحرك لما الضوء يجي عليها.

الكاميرات الخلفية موجودة في شكل بيضاوي .. المُلفت أكتر هو شكل العدسة الرئيسية الخلفية عاملينها كبيرة أوي وكاتبين تحتها 50 ميجا بيكسل، شكلها مش وحش بس كل ما الزجاج اللي على العدسات يكبر كل ما يبقى معرض أكثر لإنه يتخدش بسهولة ويتكسر أسهل

البصمة موجودة في الظهر .. كان الأفضل تكون موجودة على زِر الباور .. والموبايل وزنه 201 جرام وزن مش تقيل ولا خفيف، وتخانته متوسطة 8.8 مللي .. والموبايل معاه جراب في العلبة.


الشاشة :-

شاشة الموبايل 6.78 بوصة كبيرة من نوع IPS LCD بدقة FHD+ بتردد بيوصل لـ90 هيرتز مع ثُقب في الشاشة حجمه مش صغير.

جودة الشاشة ممتازة بصراحة .. الشاشة فعلًا ألوانها كويسة وسطوعها تحت الشمس معقول جدًا .. والشاشة بتجي متركب عليها سكرينه في العلبة.

ولما قارنتها بـ شاشة Redmi 10 اللي في نفس الفئة السعرية لاقيت شاشة Hot 11S بتقدم ألوان أحسن مُشبعة أكثر وسطوع أعلى، ودي حاجه كويسة جدًا.


الأداء :-

موبايل Hot 11S بيجي بمعالج ميدياتك Helio G88 بتكنولوجيا 12 نانو .. ده أحسن معالج حاليًا تحت سعر 3000 جنية، وهو مفرقش كتير عن G85 وبالتبعيه مش فارق عن G80 لكن هو مجرد تحديث بسيط.

السوفت وير بتاع الموبايل فيه ميزة Ultra Touch واللي لو شغلتها وشغلت معدل تحديث 90 هيرتز هتلاقي أداء الموبايل سريع جدًا ومعقول جدًا .. لكن مع الضغط على الموبايل هتلاقيه بقى أبطأ شوية.

ولما قارنت الموبايل بـRedmi 10 لاقيت ان الـHot 11S كان أسرع حاجه بفرق بسيط في معظم المهام البسيطة، سوفت وير انفينكس أخف شوية وبيتعامل أسرع في فتح البرامج.

الأداء الرسومي بقى، ببجي بتشتغل على High HD .. التجربة معقولة، ممكن تلاقي تقطيع بسيط في الـGraphic بيحصل كل فين وفين.

السخونية بتاعت الموبايل معقولة جدًا .. الموبايل شاطر فعلًا في تشتيت الحرارة واستغل الجسم البلاستيك صح .. وكمان المعالج مش بيحصله إختناق كبير لما تضغط عليه.


عوامل الأمان وعناصر اخرى :-

البصمة في الظهر .. أداءها سريع جدًا ومُمتازة بصراحة .. والـFace Unlock أداءه كويس جدًا جدًا .. الموبايل بيجي بـAndroid 11 مع واجهة XOS 7.6 وفي ميزة xClone لعمل نسختين من برامج التواصل الإجتماعي.

واجهة انفينكس لسه فيها اعلانات كتير رخمة بترخم عليك التجربة .. لازم الاعلانات دي تقل .. والموبايل مفيهوش لمبة إشعارات ولا فيه NFC ولا فيه ميكروفون اضافي لعزل الضوضاء.

صوت الموبايل Stereo .. ولكن مش بمعنى الكلمة لإن السماعة اللي فوق بتاعت المكالمات مش قادره تأدي خالص ومُجملًا لما قارنت صوت Hot 11S مع Redmi 10 الريدمي تفوق.

مستشعر التقارب بتاع المكالمات موجود هاردوير وشغال ممتاز جدًا .. وكمان الموبايل فيه تسجيل مُكالمات من غير برنامج اتصال جوجل .. والجيروسكوب هنا سوفت وير مش هاردوير فا مش هيبقى دقيق.

شبكات الموبايل ده تاخد تقييم فوق المتوسط سواء Wi Fi او شبكات الإتصال .. مش أقوى حاجة وفي نفس الوقت مش ضعيف ومش هتعملك أزمة.


البطارية :-

بطارية الموبايل بتيجي بحجم 5000 مللي امبير .. أداءها كويس مفيهوش أي مشاكل، هتكمل معاك حوالي 7 ساعات شاشة مفتوحة وأكثر.

الشاحن المُرفق في العلبة 18 وات .. شاحن معقول جدًا في الفئة السعرية دي .. شحن البطارية في أقل من ساعتين، وده وقت كويس جدًا، وأكيد منفذ الشحن USB Type C.


الكاميرات :-

موبايل Hot 11S بيجي بكاميرا خلفية رئيسية 50 ميجا بيكسل F/1.6 .. مع عدسة تانيه 2 ميجا بيكسل للعزل وعدسة تالته للذكاء الإصطناعي .. والسيلفي 8 ميجا بيكسل F/2.0 مع فلاش LED مُزدوج.

أداء المستشعر الإقتصادي الـ50 ميجا بيكسل مع معالج Helio G88 مش بيكونوا أفضل حاجه .. أداء الكاميرا الخلفية هنا متواضع، معالجة الألوان متواضعه، محتاج تعمل للصوت تعديل.

لما جربت الموبايل جنب الـRedmi 10 بنفس الكاميرا والمعالج لاقيت تفوق للـHot 11S شوية في الألوان، وكان بيجيب تفاصيل أفضل في بعض الصور.

بالنسبةل لسيلفي فا Hot 11S بيقدم كاميرا سيلفي متواضعه جدًا، الألوان مش مظبوطه في أوقات كتير، وعمومًا مفيش سيلفي هتلاقيه يُعتمد عليه في الفئة الإقتصادية.

بالنسبة لتصوير الفيديوهات بالموبايل فا هو بيدعم تصوير فيديوهات بجودة 1440p مع 30 فريم في الثانية .. مفيش مثبت إلكتروني ومفيش ميكروفون اضافي لعزل الضوضاء.

شوف تجربة التصوير بالموبايل صور وفيديوهات في فيديو المراجعة !


سعر Infinix Hot 11S :-

  • نسخة 128 جيجا مع 4 جيجا رام بسعر 2800 جنية

بينفع تركب شريحتين إتصال من الجيل الرابع مع كارت ميموري 256 جيجا في نفس الوقت.


الرأي النهائي :-

مميزات Infinix Hot 11S :-

  • معالج كويس بأداء معقول جدًا
  • شاشة ممتازة من ناحية الألوان والسطوع والسرعة
  • بطارية كبيرة
  • شحن سريع
  • عوامل أمان سريعة

عيوب Infinix Hot 11S :-

  • مكان البصمة قديم في الظهر مش على زرار الباور
  • الصوت الـStereo مش عالي
  • السيلفي مش الأفضل
  • في اعلانات في السوفت وير

موبايل Hot 11S يعتبر واحد من الموبايلات الكويسة اللي ممكن تفكر تشتريها تحت الـ3 الاف جنية .. قدر يتفوق على ريدمي 10 في جودة الشاشة وسرعة السوفت وير والكاميرا الخلفية، كمان الـHot 11S بـ2800 جنية هتاخد نسخة 128 جيجا مش 64 جيجا زي ريدمي 10.

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

كل الموبايلات

أحدث الهواتف

أحدث الاخبار